I N A

SA MANIPIS KONG ISIP, AKING NAGISNAN
(Pare may toma ang tropa sama ka)
ISANG BABAENG DAPAT KONG IGALANG
(O.K. saan ang puwesto?)
SIYANG GUMABAY AT NAGTURO NG DAAN
(Pare juts para mamaya yan)
UPANG MAIWAS SA MGA KASALANAN
(Mababait po ang barkada ko inay...)

ARAW NA SINAKRIPISYO'Y HINDI NA MABILANG
(Putya ubos na naman ang allowance ko)
MGA PAGHIHIRAP KANYANG NILABANAN
(Kailangan ko po ang pera para sa project ko)
MAPABUTI LAMANG ITONG MUSMOS NA BATA
(Puede bang kalahati muna anak? Hindi pa nagbabayad yung nagpalaba sa akin)
NA MINAHAL NA MAGMULA NG INILUWA
(Pare inom tayo naka diskarte ako ng pera kay nanay)

WALANG HALAGA ANG PUWEDENG IPALIT
(Mr. Dela Cruz bakit laging mapula ang mata mo)
DITO SA INA, NA PUSO AY MARIKIT
(Wala po mam puyat lang po ako)
SINO MAN ANG SA KANYA'Y GUMIPIT
(Baka naman nagdra drugs ka?)
BUHAY KO MAN AY IPAGPAPALIT
(Hindi naman po mam)

SA AKING PAGLAKI'Y UNTI-UNTING NATUTUNAN
(Bok sama ka didiskarte tayo ng pera)
ANG HALAGA NG MAY ISANG MAGULANG
(kayo na lang baka mahuli tayo)
PAGSAPIT NG PANAHON KUNG SIYA'Y MATANDA NA
(Pare si Dela Cruz nakakulong, nahuling nang hold-up)
AKING PAGLILINGKURAN HANGGANG KAMATAYAN
(Ano si inay inatake sa puso?)